زوال امريكا واسرائيل في عام 2022 م وبالدليل

في الإعدادي انتشر خبر مفاده أنه في مولود اتولد بدقن وقال كلمتين ومات – يعني اتكلم في المهد فيبقي ولي طبعًا وكلامه مصدق ، هذا ما وقع في عقولنا المراهقة ، المهم قال إيه ؟ قال : ياويلك يا مصر يوم الاربع شهر 4 الساعة أربعة ، وبالفعل كان يوم 4 في الشهر دا بيوافق يوم الأربعاء ، صدقنا و خوفنا ، الإشاعة انتشرت بقوة لدرجة أن الكبار تعبوا معانا عشان يفهمونا إن دي حاجة اسمها كدبة ابريل .

في التسعينات أيام الثانوية بالتحديد كنت مدمن القراءة لأدباء مصر ومفكريها ، لكن من حظي السئ وقعت في ايدي مجموعة كتب لواحد اسمه " محمد عيسى داود " ، بيتكلم فيها عن مثلث برمودا والمسيخ الدجال والجن ونهاية العالم ، بصراحة استهوتني النوعية دي من الكتب مش عارف ليه ؟ وللأسف إتأثرت بيها جدا وأثرت على حياتي ، وقيل أيامها إن نهاية العالم سنة 2000 م ، ولما عدت الكلام أصبح على سنة غيرها وهكذا لغاية ما دخل النت حياتنا .

ولما دخل النت حياتنا فضلت أتابع فيديوهات بدل الكتب عن نهاية العالم وارامجدون ، و ممكن أقضي ساعات وأنا اشاهد فيديوهات اليوتيوب لمشايخ عن علامات القيامة واقترابها ، وإن المهدي المنتظر خلاص على الابواب ، وبحساب الـجمَّل أنه العالم سينتهي في عام2012 م ، وبعد شوية الكلام بقى على 2017 م ، وللأسف ساعتها وبسبب سذاجة المرحلة بأه وصلت لقناعة إن دا هيحصل ، من خلال تقارير مكتوبة ، و خطب المشايخ المعنية بآخر الزمان ، وأيضا من خلال تنبؤات السابقين القديمة جدا زي نوسترادموس ، والجماعة بتوع الفلك والنجوم اللي بيملوا الشاشات في برامج التوك شو وخاصة في بداية كل عام ، هري كتير بصراحة كان له أثر وحش في حياتي .

كانت بمجرد ما تحصل أي حاجة في العالم مثلا " تحفظ الصين على مركب صيد أمريكي يتسبب في توتر بين البلدين " تلاقي عناوين الفيديوهات في اليوتيوب اتغيرت :

الحرب العالمية الثالثة على الأبواب ..
العالم على مشارف حرب نووية
أمريكا والصين والمهدي المنتظر
نهاية اسرائيل باتت وشيكة

وعنواين زي دي كتير جدا وبتحظى بمشاهدات كبيرة ، اتضح انها سبوبة كبيرة لأصحاب قنوات ع اليوتيوب عشان تجذب أكبر عدد من المشاهدين فتحظى باعلانات وبالتالي أرباح وكده .

وهما عشان عارفين أنه في ناس كتير عندهم تواكل في كل شئ و بتتمنى الكوارث الطبيعية هي اللي تحل مشاكلها مع الآخر من خلال موتهم كوسيلة سهلة جدا، وسريعة ، فتلاقي عناوين فيديوهات اليوتيوب دلوقتي تحمل هذا المعنى : اعصار ايرما بداية نهاية امريكا ، ناس معندهاش دم عشان لما كلامهم بيطلع غلط ، محدش بينطق ، ولا حاجة بل بالعكس هتلاقي فيديو جدبد على نفس القناة بيقولك : زوال امريكا واسرائيل في عام 2022 م وبالدليل .