دجاج و ضـجـيج

سألت نفسي كتير وأنا بشتري دجاجة من عند الفرارجي هي ليه مستكينة كده ، يحطها على الميزان تقعد مستكينة ، يرميها في ركن غرفة الدبح والتنضيف وخلافه ، بمجرد ما تلمس الارض تنكمش ف بعضها كده ، وتفضل مستكينة ، ومستنية دورها ف الدبح ، هي ليه ما بتفكرش تهرب ، تجري ، تكاكي بعنف ، ليه ما بتحاولش تعمل أي حاجة غير إنها تستكين ، عرفت أد إيه التدجين وحش ومهين جدا في حياتنا ، في ناس كتير تحب تعيش دجاجة ،  تلاقي الشخص المدجَّن دا بغض النظر عن نوعه  بيقبل كل شئ ، وأي شئ ، ويقولوا عليه طيب ومتعاون وحبوب ولذوذ وهو منسجم ومرتاح للصفات دي ، أما اللي بيعمل حركة وضجيج  دا متمرد و مقرف ويخنق وبتاع شو .

 عارفين أول ما يحبوا يضحوا بحد بيبعدوا عن بتاع الضجيج ، عشان مش عايزين وجع دماغ ، فيروحوا لمين عشان يدبحوه وهو مستكين ؟ أيوه ..الله ينور عليكم  .. الشخص الدجاجة ، طيب الدجاج ربنا خلقه كده ، إنت ليه بتعمل كده في نفسك ، مش من حقك تركن عقلك ع الرف ، وتكهن كرامتك ، عشان دول بيميزوك عن الدجاجة ، المشكلة الأكبر  لما يبلغوه بأمر الدبح ويحس بالصدمة الكبرى ، تفتكروا هيعمل إيه ؟ عشان تم تدجينه  بمهارة مش هيقدر، ولا هيعرف يعمل ضجيج يليق بالموقف ، لكن ممكن يعترض ويعلى صوته ويقول : أوعوا حد فيكم يفكر إنه يعملني بروست  أنا عايزكم تعملوني مشوي .