حسبة إيرما

صرح ترمب : لا تعنينا الخسائر المادية فالأهم أرواح الموطنين .

بحسب آخر إحصائية الخسائر المادية لإعصار إيرما بلغت 290 مليار دولار وضحايا الإعصار حتى الآن 3 مواطنين فقط ، ليه ؟ لأنه في دولة ، وفي خطة دقيقة لمواجهة الكوارث ، وكل واحد عارف دوره

طيب ماذا لو جاء إيرما في بلد عربي تعالوا نتخيل التصريحات:

الرجل الأول : انا عارف ان الضحايا كتير أوي اوي .. بس انتوا عارفين احنا صرفنا كام عشان ننقذ التلات مواطنين اللي فضلوا دول ..

الرجل الثاني : أنا مش عارف أقول " قلبي مع أسر الضحايا " عشان الأسر كلها راحت في الإعصار وعشان كده مفيش تعويضات لحد ..والفلوس هتروح لإعادة الإعمار و البنية التحتية .

إعلامي 1: الست دايما صاحبة المصايب في حياتنا وف بلادنا والدليل إيرما - إيرما دا اسم ست على فكره عشان تبقوا عارفين - وبيفكرني بأغنية الست شادية أنا إيرما لادوس وياما العشاق خدوا مني دروس .

إعلامي 2 : أنا بقترح نعمل صندوق باسم " صندوق الأعاصير " ويبقى تحت اشراف القوات المسلحة ونخاطب أخوانا في الخليج و كل أحرار العالم أنهم يقفوا معانا في الازمة دي

إعلامي 3 : والله احنا ربنا كرمنا بالاعصار دا عارفين ليه ؟ احنا عندنا انفجار سكاني والاعاصير دي بتحل الازمة دي وعددنا بيقل .

إعلامي 4 : اللي ورا الإعصار دا أكيد الإخوان

إعلامي 5 : الحمد لله كل الضحايا مننا ومفيش حد أجنبي 

وأخيرا لقاءات تلفزيونية مع الـ 3 مواطن اللي نجوا من الكارثة دي عشان يجاوبوا على السؤال الجوهري : كنت فين ساعة الإعصار ؟