يعنى إيه أولى ابتدائي ..!!؟

في شهر سبتمبر بتيجي في دماغي كتير من ذكريات التعليم والمدارس يمكن كنوع من تجهير النفس والتعايش مع جو الدراسة لتخفيف أحداث 23 سبتمبر  (الجميلة طبعا) 

كنا زمان واحنا تلاميذ في الابتدائي نشتاق جدا لبدء الدراسة ونسعد بشراء مستلزمات المدرسة ، أذكر جيدا إني في الاجازة كتبت اسماء كل زملائي في الفصل ، ورسمت الفصل ، والتخت ،ووشوش صحابي ، ورسمت اساتذتي كمان وعلقتهم قدامي ، لكن في فترة الاعدادي كنا بنعتبر الدراسة نكد وبدايتها حرمان من الحرية ومتعة الاجازة وبنغني أغنيتنا الشهيرة في اليوم اللي قبل بدء الدراسة ونقول " بكره النكد بكره " .

والوضع دا لحد دلوقتي تلاميذ الابتدائي بيشتاقوا جدا للمدرسة ، لكن كثير من الطلبة اللي في سن المراهقة بحسهم مخنوقين وحاسين انهم رايحين السجن بمعني "الأجازة خلصت ولازم نسلم نفسنا " .

افتكرت الاستاذ على يوسف الله يرحمه ، قابلته في بداية تعييني ، وكان رجل حلو الحديث ، يحب الدعابة ، كان لما يحب يخلص حوار مع حد اختلف معاه يقوله : ابعد عني ..أنا درست للصف الاول الابتدائي 11 سنة متتالية يعني معاي شهادة اني اتعامل معاملة الاطفال ولا يؤخذ بشهادتي ف المحكمة .

ومما حكاه لي أيضا أنه وجد تلميذ وشه محتاج نضافة وكل يوم ينبه عليه يابني اغسل وشك قبل ما تاجي ومفيش فايدة لحد ما زهق ، فجاب صابونة جديدة واداها للواد ، جاله تاني يوم وشه بيلمع ونضيف وحلو، فرح الاستاذ على وعرف ان رسالته وصلت لكن بعد فترة الواد رجع له بالوش القديم مش نضيف وجاي بغمصه قاله ايه الحكاية ليه ما غسلتش وشك ؟ فالتلميذ قاله : أمي بتقولك الصابونة خلصت يا ناظر .

كان اول ما يدخل الفصل وقبل ما يبدأ الدرس لازم يسمع لكل العيال وكل اللي عنده حكاية يسمعها سألته ليه بتعمل كده ؟ قالي : عشان قبل ما اديهم علم لازم دماغهم تفضالي ويطلعوا اللي عنديهم ، فكان اول ما يدخل يتجمعوا حواليه وواحد يقوله يا استاذ بقرتنا ولدت امبارح وبعدها تنفلت الحكايات وواحد تاني يقوله وانا كمان يا استاذ أمي ولدت وجابت واد ، واللي يقوله انا شفتك امبارح بالعربية الكر وبالأمرية كنت محمل برسيم ، يقوله :صح ياولدي ، واللي يقوله انا رحت فرح امبارح وشربت 3 قزايز كاكولا ، وحكايات كتير زي دي .

المهم ظروف اضطرتني السنة اللي فاتت ادرس لمدة شهرين في الصف الاول الابتدائي بعد غياب 13 سنة فقلت اعمل زيه وقبل ما ابدأ الدرس اسمع لهم ودا اللي حصل :

بسم الله في حد حابب يقولي حاجة قبل ما نبدأ
- أيوه يا بابا .. يوووه ..قصدي يا مستر
- :) نعم
- يا مستر ممكن رقمك عشان بابا عايز يكلمك ويسالك عليا عشان تقوله شاطره
- هههههههه تدفعي كام حضرتك ؟! طيب حاضر
بسم الله يلا نبدأ الدرس
- يامستر سلمي و ندى بيقولوا لي خاصمي أروي وأنا مش عايزة
- برافو عليكي و اخص عليهم
بسم الله يلا نبدأ الدرس
- يامستر ممكن أروح الـ WC
- أنا عرفتك من عينيك .. إنت بتكدب
- أيوه يا مستر صح .. طيب أروح أشرب
- ياسلااااااااام .. اقعد مكانك ياااض
بسم الله يلا نبدأ الدرس
- لما تخلص يا مستر قولي عشان ( أدس ) الكتاب
- ليه يابني هو احنا سارقينو
بسم الله يلا نبدأ الدرس
- يا مستر فاضل كام ونروح ؟
- لسه الجرس ما ضربش
- ما ينفعشي المكروباصات خلاص جات يا مستر ولازم نمشي
(غاضبًا ) بسم الله يلا نبدأ الدرس ومحدش يكلمني في أي حاجة غير الصفحة دي
- يا مستر انا اخدت الصفحة دي ف الدرس امبارح
--------------------------------------------------------
فـ أولى ابتدائي يعني لا تخلو حصة من ابتسامة من القلب ووجع في القلب أيضًا :)