الريس متقال في عصر الفيس

ملف قديم لقيته صدفة النهاردة كتبته في 2011 أول ما ظهرت هوجة الفيس عندنا ،تخيلت أن الريس متقال وخضرة محمد خضر بيغنوا ع الربابة وبيردوا على بعض مستخدمين مفردات مواقع التواصل تعالوا نستحضر نغمة الربابة ونشوف هيقولوا إيه :

بالذمة دا جمـــــال يتساب
ما تجيبي يابت الواتــساب
أو فــيسـك أو حــتى تويتر 
ولا أجــى أخبط ع الباب
😍
غزلك ماسـخ اقـــفل سُك
كـُـل كلامك عَك ف عك
وانا هـعـمل أحلى أكونت
بس ياحــلو هاـديك بلوك
🤐
هــــاروح ابصبص ع البروفايل
بحساب وهمي وقلبي انا شـــايل
ولــــمــا بــكره تـــحـني عـليـــا
هابعت add و poke وسمايل
😎
والله صُعبت علــيا يا مـــرزي
والحــــياه بقى لونها بــرونزي
عـــمال تلـعــب كده بمشاعري
زي قــــماشـــة فـــ يد الترزي
😥
بكره الصــــبح حـ sign in
واتــواصل وياكي و أحـــــن
اوعــــي بس تكوني اوفلاين
تخلص باقتي واروح اشحن !
😏
بكره الصبح انا عندي خبيز
ممكن بعد العــــصر بــــليز
نتقابل .... نتصور سيلفي
وأنا وأنت بنقول تشـــــــــيز
☺️
ننزل بـــــقى على نستجرام
والله علــــيكي مخ ابن حرام
وكمان قلب كبير يا حــــياتي
يوزن كده يجي الف جــرام
😂
اسمــــع مني يا واد راح أهيبر
أنا عايزاك تخطبني ف سايبر
وتــجــــيبلي هـــــدية أي فون
لـــــجل ما نـشيّت ع الفــــايبر
😍
بتقولي ايه ماسمعشي واصل ؟
شــــكل أم الـــخط فــــــاصل
قال اجـــــيبلها قال اي فـــون
ملعونه مـــــواقع الـ تواصل
🤔