كوز المحبة اتخرم

إيه اللي بيميزكم كمدرسة لغات عن باقي المدارس ؟

السؤال دا اتوجه من الراجل اللي قدامي في الميكروباص – اللي اتضح انه باحث - للمراهق اللي جنبه –اللي باين من لبسه انه طالب في مدرسة لغات خاصة - ودار الحوار التالي :

الباحث : إيه اللي بيميزكم كمدرسة لغات عن باقي المدارس؟

الطالب : ؟!!؟!!

الباحث :أصل انا بعمل ماجستير دلوقتي عن التعليم في المدارس الاجنبية واللغات وأثره على الهوية المصرية

الطالب : !!؟؟!!

الباجث : يعني أقصد هل دراستكم المكثفة باللغة الانجليزية أو الفرنسية بتؤثر سلبًا على هويتكم الشرقية العربية المصرية ؟الطالب : !!؟؟!!

الباحث غاضبًا : م الاخر بتقول " Break " و " Class " ولا بتقول فسحة وفصل ؟

الطالب : بنقول " اللهم طولك يا روح "

الباحث (يتراجع) : معلش يا حبيبي .. أقربلك الفكرة أكتر.. بتحبوا تسمعو لمايكل جاكسون وكريس براين و كاين ويست ولا ... الطالب : بس فهمتك .. اطمن يا دكتور احنا جيل متربي صح

 الباحث : جمييييل بس أنا مش دكتور أنا لسه هاعمل ماجستير

الطالب : مش مهم .. بس انا محافظ ع الهوية يعني بسمع ( آه لو لعبت يازهر ) و (أديك ف الجركن تركن) ) ومن الاغاني الحديثة أغنية بيقول مطلعها ( جاي بكلمها الشحن فصل .. زعلتْ واتقمصتْ م اللي حصل ) والتكاتك خير دليل حضرتك .. بس بصراحة انا لي رأي مخالف عن كل الكلاس بتاعي

 الباحث مصدومًا : خير ..إتفضل ؟

الطالب : أنا شايف إن أكتر أغنية بتعبر عن البتاعة اللي اسمها الهوية دي هي أغنية " مفيش راجل بقى راجل "

الباحث يائسًا : ولا باحث بقى باحث يابني ، على جنب يااسطي

حوارهم خلاني أسرح في أيام الكلية - في التسعينات يعني – كان يومنا بيعدي ندوات أو حفلات أو كافتريا أو تسكع حول المباني ولما نمل بنحضرلنا محاضرة أو اتنين ، كنا حاسين ان قدراتنا اكبر من الكلية اللي احنا فيها والدليل يومين مذاكرة ف آخر السنة بنلم المنهج ونجيب تقدير كمان .أيامها كنت بسمع أغاني كانت ونس بيلائم طبيعة المرحلة ، في الفترة دي عشنا مع كاظم الساهر وشريط "اختاري" بالذات ، بجانب ثومة ونجاة طبعا، وغناوي "سلين ديون" في فيلم تايتانك ، كنا حاسين إننا ذواقيين حبتين ، كنا لما نحب نتريق على الاغاني الهابطة نقول إنها من فصيلة " كوز المحبة اتخرم " أغنية لا ليها معني ولا فيها جمال ، حتى جاءنا من أقصى الجامعة طالب يسعى قال :

 كوز المحبة اتخرم" يا قوم مقصـدكم

 فيها خـــــيال وفيها الحس والقـــــيـم

قد جعل الحب كـــوزًا ثم واصـــــلـها

 فالبعد نصلٌ ومنه الكــوز ينــــخــرم

دي طلع فيها خيال واحنا مش دريانين يا خال ، ومن ساعتها بطلنا نتريق ، وبقينا نسمع عدوية كمان .نزلت من العربية وضبطت نفسي بدندن بـــ مطلع ينفع غنوة بيقول :

" يا جميلة جمال الحور العين

سيبي المواعين اللي ف ايدك

وتعالي نهيص "

يااااااعيني حد يديني رقم شعبان عبرحيم يا جدعان :)