المجتمع بتاعنا مليان سلبيات زي أي مجتمع .. بس عندنا بتعدي عادي .. بمعنى لو لقيت طفل بيسب الدين ف الشارع اخرك تهمس لنفسك ب (استغفر الله العظيم) وتكمل طريقك عادي .. طيب تخيل بقي لو شخص دخل قهوة وقت الأذان وهو مايعرفش حد ووجه كلامه للجميع : ممكن نقوم كلنا نتؤضا ونصلي لو تكرمتم .. هتلاقي لحظة توقفت فيها رشفات الشاي وانفاس الدخان وهيبصوا بغرابة شديدة للشخص دا .. و أينعم هتلاقي الاغلبية طنشت بس الجرئ فيهم هيقول : ادعيلنا .. والاجرأ هيقوله: أنت مالك ..و لو مثقف شوية هيقوله : إنك لا تهدي من أحببت .. والمجادل هيقوله : دي علاقة بيني وبين ربنا محبش حد يتدخل فيها .. والفاجر هيبلغ عنه ... وإلخ
بمعنى أن الشئ السلبي بقى عادي ولو حاجة كويسة بقت غريبة .. غريبة جدا
النهاردة موقف حصل لصديق لي و المفترض إنه عادي ..
ببساطة وبدون مقدمات الراجل سواق الميكروباص (قفط / قنا) أصر بشدة إنه ما ياخدش أكثر من حقه .يعني ياخد الأجرة المقررة اللي هي 275 قرش... ايوه حضرتك أصر وبشدة يرجع الباقي - اللي هو ربع جنيه ودا مبلغ تافه جدا في ثقافتنا
طيب يااسطى احنا مسامحينك .. اسف دا مش من حقي
ياعم أتصدق بيه .. لا صاحب المال يتصدق بيه
المبلغ بسيط ما يستاهلش .. مفيش فايدة
طبعًا ماكانشي معاه أرباع كفاية ورجع الباقي جنيهات والركاب تتصرف مع بعض ..
وهنا بدأ الألش .. اللي يقولوا انت اكيد مش مصري أصيل .. وأكيد إنك ماشربتش من نيلها ... هبلغ عنك زمايلك في الموقف ...إلخ
انا بضرب كف بكف مش من تصرفه ..لا من الاحساس الجديد اللي مش عارف اوصفه بس انت اكيد هتحسه لما تبقي كل حاجة غلط صح وكل حاجة صح غلط ..
تذكرت اللي حصل مع واحد مصري في اليابان اول مرة يركب تاكسي هناك من المطار للفندق شاف العداد90 ين فادالة ورقة ب ١٠٠ين وساب الباقي إكرامية وكده ..السواق بدأ يرطن ياباني وصاحبنا افتكر أنه عايز زيادة تاني ..حلف صاحبنا طلاق بينه بين نفسه أنه مايدهوش ين زيادة .. أومال .. دا صاحبنا مصري مدقدق ومحدش يضحك عليه .. فسابه ودخل الفندق ..قام السواق دخل وراه وكلم موظفة الاستقبال اللي بدورها ترجمت الكلام بالانجليزي لصاحبنا واتضح إن السواق هناك بيعتبرها إهانة إنه ياخد أقل من أجره أو أكثر برضوه .. يعني البقشيش هناك حرام ولا إيه ؟ آه الزيادة زي النقص بتعمل خلل .. وصاحبنا زودها شوية بصراحة وأهانه إهانة هزته جدا أصلها بقوة ١٠ ين .
0 التعليقات :
إرسال تعليق