الطريق إلى إيلاج

باختصار في حفلة  فيها عدة فرق شبابية منها  فرقة "مشروع ليلى" اترفع علم به ألوان الطيف لمدة 10 ثواني  ومعروف إنه بقى رمز للشواذ في العالم ، وأنا أفضل لفظة "شواذ " على لفظة "المثليين" لأنها تحمل رأي وثقافة ولا نحتاج لفظة محايدة لأن احنا كمجتمع وكدين وكطبيعة لا نقبل هذه الافعال ، المهم  الهري هيشتغل ع الموضوع دا ف التوك شو طبعا 10 ايام  بهدف عمل حلقة مثيرة وبس ، أحد شباب الباند اللبناني دا  تصدر غلاف إحدى المجلات الأجنبية وتحته مانشت بيعترف بميوله الشاذة ، وكان فرصة للي زيه يتجمل معاه في الحفل برفع العلم في بلد الأزهر الشريف  كنوع من التحدي واعلان الوجود ، الفرقة دي والمنظمين خدوا كل الموافقات الأمنية اللازمة ، بس  في فيديو مهم  لكل أم وأب لازم يسمعه من واحدة شاهدة على الحفل :

تفتكروا احنا رايحين على فين ؟

تيقنت إن شريحة من جمهور الباندات دي عيال مدلعة لدرجة الضياع، ومعظمه اعدادي وثانوي وجامعة يعني في مرحلة التشكل الفكري والوجداني ، والأخلاق مش ف دماغه خالص ، الالفاظ الشمال منتشرة بين الكل ولاد أو بنات ، وياريت جات ع الالفاظ وبس ، مقتنعين إن الروشنة هي التحرر ، وقلة الأدب هي الصح اليومين دول  ، وإن الهوي هو الدين ، وكل حوار جاد هو حوار فاكس وممل وموضة قديمة ، وكل همهم الغنا ،والجنس ، والموضة إلخ ، و لا خطب بتأثر فيهم ، ولا نصايح ، وطبعًا ولا مدارس ، ولا إعلام هادف .

قلت لنفسي هو يا تشدد يا انفلات ، بفرح  جدا  لما الاقي شباب معتدل ، وسطي ، ايجابي ، همته عالية ، مبدع في تفكيره ، بقول هما دول اللي يقدروا  ينقذوا الشباب  المتشدد والمنفلت من الضياع ، لأنهم مش بيسمعوا للكبار ، والكبار سلطويين شوية ، ومشغولين شويتين .


حوار الحفلة أكيد هيفكرك بأفلام ناقشت المشكلة دي بشكل عابر لكن  في رواية لـمحمد عبدالنبي "في غرفة العنكبوت " بتعبر عن الشريحة دي اللي موجودة في المجتمع من خلال حكاية بتدور أحداثها على لسان  شاب شاذ ، وبيوضح خلالها أن المشكلة كلها بتكمن في انشغال الكبار الشديد عن الصغار ، وفي الثقة العمياء في كل المحيطين بالطفل ، فلازم ما نغفلش دور الكبار السلبي اللي وصلهم للنتيجة دي .

كمان نصيحة أخيرة لو ابنك بيحب فرق غربية أو شرقية بتقلد الفرق دي ، هتتصدم لو سمعت كلام بعض الاغاني دي ، لانها بتدعوهم بشكل خبيث إلى التحرر من كل شئ ، وإن لم تكن تقودهم للشذوذ فتقودهم لتقبله ، وكمان بتحتوى على أفكار الحادية كتير ، هتخرج جيل لن يحقق لنفسه شي بل سيتجه للادمان والاكتئاب أصل الحاجات دي كلها بتبقى باكدج ، وكمان مش هيعرف يحقق شئ لبلده ، ولا يعرف يدافع عنها كمان ،  يعني هيضل طريقه ومش هيعرف الطريق إلى القدس ولا "الطريق إلى إيلات"  لكن الطريق إلى إيلاج ممكن جدا .