طوابير النعال

النهاردة الصبح رحت البنك كانت مكاتب الموظفين كلها قدامها طوابير ، اخترت أقصرها ووقفت آخر واحد ، زعلت لأني كنت واخد كتاب اقراه في وقت الانتظار وما كنتش عامل حساب إنني هقف ، بصراحة جربت اقرا ما ارتحتش ، الشاب البدين أمامي بصلي وقال: انا بشبه عليك؟

عامة أنا مش بحب أدخل في حوار ممل مع غرباء في طوابير أو في سفر ، بحب العزلة مع كتاب ولو مفيش ببقى مع نفسي يعني باتحاور معاي ، المهم نرجع لسؤال الشاب البدين وهو مدخل مشهور لعمل حوار مع أي حد أنا اعتبرت جملة "أنا بشبه عليك " زي جملة "الجو حر النهاردة مش كده ؟" وبمجرد تجاوبك تنفلت الحكايات ، رديت بجفاف : أكيد اتقابلنا في طابور عيش او طابور بنزينة أو طابور تذاكر قطر ، فتبسم وقالي : على رأيك ..ما هي مصر كلها طوابير .

بعد شوية حسيت بألم في أقدامي بسبب الوقفة وحسرة على عدم تمكني من القراءة ، فتشجعت وقلت له :أنك أكيد تعبان من الوقفة ، وافقني وأكملت : أنا عندي فكرة شفتها قبل كده في صورة تقريبا في اليابان أو تايلند ، وهي ببساطة إننا محتاجين نرتاح على الكراسي وفي نفس الوقت نحفظ دورنا فإيه رأيكم نسيب أحذيتنا هي اللي تقف طابور ونقعد ونرتاح حافيين لحد ما كل واحد ياجي دوره والأرض زي ما إنتوا شايفين رخامية ونضيفة ، وقبل أن يرد تفاعل آخرين : ياريت بس الناس ، قلت لهم : صدقوني لو بدأنا الناس ممكن تعمل زينا ، قال أحدهم : لا انا مش خايف من نظرة الناس ، انا قلقان من الناس ممكن تتعدي على أماكنا بسهولة أو حد يشوط أحذيتنا برجله ويلخبط لنا الدنيا ، قلت له بابتسامة هادئة : إطمئن .. أي حد هيشوف لومواخذة الجزم والشباشب مرصوصة بالشكل دا هيفهم وهيحترم الوضع .

وبالفعل بلغنا كل فرد في الطابور بالفكرة ومش فاضل غير التنفيذ ولسه هاقلع الشبشب ، لقيت واحد جـتة طول بـعرض والشال مرمي بعشوائية على كتفه جه جنبنا وبيتلزق .. واقف صف تاني يعني .. بقوله : ارجع ورا لو سمحت ، قالي بقرف : ما انا واقف ف الطابور ومن بدري ، اتعصبت : ياراجل دا احنا لسه شايفينك وملكش مكان بينا .. ودار حوار سخيف وصوتنا على .وتحت ضغط وعناء من كل أفراد الطابور تراجع ، فبصولي ولسان حالهم بيقول : بالذمة دا احنا جتت واقفة وجه واحد يعتدي على حقنا في الصف وانت قال عايز تسيب الشبشب يحفظ دورنا، نطق راجل كبير كان مستغرب الفكرة أصلًا وقال لي : النعال في بلدنا ياولدي ملهاش غير الأرض ووشوش الخلايق دي ، بصيت في الأرض وقلت في نفسي أدي آخرة اللي يقرأ عن الحياة في الكواكب الأخرى فعيش عيشة أهلك يا تهلك .